حسن الثقة بالله

الله سبحانه وتعالي خلقنا لنعبده .. وميزنا عن سائر المخلوقات بنعمه العقل .. كل شئ في هذه الدنيا ربنا خلقه ربنا جعله مصير لا مخير . إلا إحنا ربنا جعلنا مخيرين . يعني إحنا الي بنختار يعني عاوز تعبد ربنا وتحبه وتخاف منه دا بيتوقف علي افعالك وإختيارك انت .. عاوز تكون بعيد عن رب العالمين وتفعل ما يغضبه دا برده بيكون بإختيارك إنت ..

انهارده في المقاله دي انا هتكلم عن حسن الثقة بالله عز وجل ..

يعني أيه حسن الثقه بالله !!

يعني إنكـ تكون واثق في ربنا في ربنا وواثق في إختياره ليك وواثق في كل حاجه هوا بيعملهالك .. وهيا دي بقي الي اسمها حسن الثقه بالله

عشان يكون عندك حسن ثقة بالله عز وجل لازم تكون قريب من ربنا دي اول حاجه .. تاني حاجه لازم تكون واثق ومتأكد من ان ربنا عمره ما هيضرك أبدآ أبدآ .

إفتكر كده في حجات كتيره حصلت ليك معجبتكش وحسيت فيها بالندم او اتوجعت فيها .. شوف بعدها ايه الي حصل ليك !! أنـا متأكد ان ربنا عوضك عنها وان الوجع الي ربنا وجعه ليك ربنا عرفك بعد كده إنه كان في صالحك انت

وبعدين تعالي نستشهد بـ أيه من ايات الله عز وجـل " سيجعل الله بعد عسرٍ يسرآ "

أفتكر إن الايه بتشرح نفسها .. يعني ربنا عز وجل بيقولك إن بعد الوجع والألم إلي انت بتمر بيه دا هيرزقك باليسر والفرح ... وخلي بالك ربنا قال سـيجعل .. اولآ ده معناه انه مستقبل يعني بعد العسر ودي انت عرفتها .. كمان كلمه سيجعل دي لما ربنا هوا الي يكون قايلها ليك ده معناه إنه وعد ليك إن ربنا عز وجل هيرزقك الفرحه وبعدين ده ربنا يعني مش بشر البشر ممكن يقولك انا هعملك كذا وكذا وهفرحك وممكن ميعملش لكن بقي ده ربنا الي بيقولك وربنا عمره ما بيرجع في وعده

كمان ربنا عز وجل قال " إن مع العسر يسرآ .. إن مع العسر يسرآ "

خد بالك كويس ده ربنا عاد الجمله مرتين ودي فيها تأكيد إنه بيقولك ان مع العسر فيه يسر .. ربنا كان ممكن يذكرها ليك مره واحده بس لكنه ذكرهالك مرتين للتأكيد وانه بيأكد عليك إنه هيرزقك الفرحه بعد العسر

ربنا سبحانه وتعالي خلقنا عشان نعبده .. وربنا بيحبنا كلنا ايون انت مش الشخص الوحيد في الكون وربنا مخلقكش انت لوحدك وخلق مليارات من البشر لكن شوف بقي نعمه ربنا .. إن هوا بيفرغ نفسه لكل واحد محتاجه يعني انت في اي وقت تقدر تكلم ربنا وفي اي وقت تقدر تشتكيله وتدعيه ودايمآ عنده وقت ليك ومبيزهقش منك ..

تعالي برده نستشهد بـ أيه من كتاب ربنا "  وإذا سألك عبادي عني . فإني قريب أجيب دعوه الداعي إذا دعاني "

ياااه فكر في الايه كده وتأملها ببطئ .. ربنا بيقولك انه قريب منك وهيقبل دعوتك .. مش شرط ينفذهالك دلوقت لكن هينفذهالك في الوقت المناسب .. عاوزك تعرف إن الله كريم اوي مبيخيبش ظن حد ابدآ ولا بيكسر بخاطر حد

المقاله إنتهت .. كل الي انا عاوز اوصله ليك إن ربنا دايمآ بابه مفتوح ليك مهما عصيته اول لما بترجعله بيفتح ايده وبيضمك ليه .. مهما بتغلط بيسامحك .. خلي عندك حسن ثقه فيه وهتكسب مفيش حد عمره توكل علي الله وربنا خذله ابدآ